Primbon

Petangan kangge nyumerepi tiyang saged cekap utawi boten

Neptunipun dinten lan pekenanipun rikala tiyang wau lair kagunggung lajeng dipun petangi: Cucuk, waduk silit. Manawi tiyang ingkang lairipun dhawah dinten lan pekenan neptu:

7 – 10 – 13 – 16. Petanganipun dhawah : a. cucuk

8 – 11 – 14 – 17. Petanganipun dhawah : b. Wadhuk

9 – 12 – 15 – 18. Petanganipun dhawah : c. silit

Terangipun makaten:

1.      Tegesipun cucuk wau saged pados, nanging boten saged simpen. Mila tiyang ingkang kelahiranipun neptu 7 – 10 – 13 – 16 punika adhakanipun boten saged simpen rijeki, awit upami simpenanipun saweg nglempak sakedhik kemawon, temahan simpenanipun inggih lajeng telas.

2.      Tegesipun wadhuk punika wadhah tetedhan, dados mesthinipun saged isi kathah utawi kenging kangge nyimpen. Mila yen tiyang kelahiranipun neptu :    8 – 11 – 14 – 17 punika  adhakanipun saged cekap panggesanganipun ngantos run-tumurun; langkung  - langkung manawi saged angsal jodho ingkang kelahiranipun cocog 8 – 11 – 14 – 17.

3.      Tegesipun Silit punika pinter pados namung saking anadhahi bucalanipun wadhuk, nanging mbucalipun ugi ajeg, prasasat kados dene milining toya kemawon. Mikla tiyang ingkang kelahiranipun neptu : 9 – 12 – 15 – 18 inggih boten saged simpen rijeki, awit manawi gadhah simpenan sakedhik kemawon, lajeng tansah kenging panggodha.

Petangan kathah sakedhikipun rejeki miturut umuring tiyang

Paangetanganipun makaten: umuring tiyang dipun bagi kados sacaraning mantha-mantha aksara jawi 20; lajeng tirahanipun dipun petang:

1.      Sri

2.      Tiba

3.      Lungguh

4.      Marem

5.      Paugeran

Upami wonten tiyang umuripun 23 taun. Angka 23 kapendhet 4 x 5 (aksara jawi 20 kapontho dados 4 golongan, saben sagolonganipun isi 5 aksara); taksih wonten tirahan 3, angka 3 punika dipun petangi: tegesipun petang lungguh, punika makaten:

Sanadyan tiyang wau nandhang sangsara, nanging meksa taksih angsal pangayoman sawatawis, upaminipun tiyang dhawah klumah, mila keraosipun boten sanget-sanget.

            Tegesipun petang sanes-sanesipun kados ing ngandhap punika:

1.      Sri            : sadaya ingkang dipun tindakaken sarwi mikantuki

2.      Tiba         : sadaya ingkang dipun tindakaken sarwi boten kaleresan: anjalari tiyang wau kedhungsang-dhungsang utawi tansah kesandhung pakewet.

3.      Lungguh  : sadaya ingkang dipun tindakaken tansah angsal margi gampil, sanadyan manggih pakewed, taksih saged manggih pangayoman utawi panglipur.

4.      Marem     : sedaya ingkang dipun tindakaken tansah angsal panjurunging tiyang sanes, mila inggih klayan sakeca kemawon sampun saged angsal kemareman.

5.      Paugeran : sadaya ingkang saged dipun tindakaken sanget mikantuki; boten namung tumprap dhiri pribadi, nanging ugi tumraping sasaminipun gesang.