Dusun
Ngerang yaiku salah sijine dusun cilik sing ana ing desa TambakromoKecamatan
Tambakromo Kabupaten Pati, Jawa Tengah sing mapan 15 km saka kutha Pati
mangidul. Dusun Ngerang lan kabeh desa sing mapan ing kidul Kutha Pati terkenal
karo sebutan Pati Kidul. Dusun Ngerang adoh baanget saka kerameane kutha lan swara laku kendaraan. Ekonomi
penduduk Dusun Ngerang kagolong menengah mengisor. Saengga penduduke akeh sing
mrantau ana ing daerah liya kanggo luru rejeki.
Miturut
sesepuh Dusun Ngerang, tembung Ngerang kuwi asale saka tembung sliweran utawa pating liweran. Jaman mbiyen ana demit (makhluk ghaib) akeh sing
mondar-mandir alias sliweran lan pating kliwerang.
Liyane
ana sing ngomong nek jaman mbiyen Dusun Ngerang kuwi jenenge Werang, nanging
amarga malakune wektu, dialek wong Dusun Ngerang dadi malih, sakliyane amarga
wektu uga amarga ilat jawa angel ngucap tembung Werang banjur diganti dadi
Ngerang supaya luwih gampang ngucape.
Dusun
Ngerang nduweni swasana sing sejuk, aman lan nyaman. Keadaan alam sing banget
asri lan sejuk amarga panggone ana ing lereng Gunung Kendeng. Yakuwi sing gawe
wong wong saka daerah liya penasaran lan pengen mara lan niliki langsung
kenyamanan lan kesejukane Dusun Ngerang.
Saka
keterangan sing wis ana, penduduk Dusun Ngerang ana sing asale saka daerah
liya. Ana sing mapan dadi warga kono lan ana sing mapan sedela amarga kerja.
Wong-wong mau asale ana sing saka Cirebon, Brebes, Tegal, Indramayu, lan
liya-liyane.
Miturut
sing wis dimangerteni marang wong akeh, Dusun Ngerang biyen kuwi yaiku alas,
nanging saiki wis dadi salah sijine dusun cilik lan endah. Dusun Ngerang duwe
sejarah. Sakliyane terkenal karo sebutan “Dusun
Santri”, amarga akeh Taman Pendidikan Al-Qur’an (TPQ), Madrasah Diniyah lan
Pesantren liyane. Dusun Ngerang saiki dadi berkah amarga ana makame Waliyullah
Nyai Ageng Ngerang. Penduduk Dusun Ngerang hormat banget lan ngenang
jasa-jasane Nyai Ageng Ngerang, amarga Nyai Ageng Ngerang yakuwi cikal bakal
Dusun Ngerang.
Amarga
kaberkahan lan keramat Nyai Ageng Ngerang iku, Dusun Ngerang Tambakromo
Kecamatan Tambakromo Kabupaten Pati saiki dikenal wong akeh lan usaha-usahane.
Contohe: perusahaan kayu, toko
elektronik, bengkel motor lan warung-warung sing bukak 24 jam. Menu spesial saka Dusun Ngerang sing terkenal
yakuwi “Sega Tewel (Sega Gori)”. Sega
lan tempe sarta jangan tewel sing kabeh mau isih anget, gawe wong akeh sing
pengen maneh lan terus pengen teka maneh supaya bisa nikmati segatewel mau.
NYAI AGENG NGERANG
Dusun
Ngerang iku pernah di panggoni lan dadi makam salah siji wong sing suci,
waliyullah (kekasih Allah) Yai Ageng Ngerang sing duwe keturunan
bangsawan/darah biru saka kerajaan Majapahit, Raja Brawijaya V (Prabu Kertabumi).
Nyai
Ageng Ngerang yaiku salah siji waliyullah sing wis akeh banget nglakoni
ritual sing keras lan dhuwur. Kabukti
karo anane sebidang lemah sing ora pati amba ing sakidule makam Nyai Ageng
Ngerang sing diwenehi jeneng “Punthuk”
lan ana panggonan sing dijenegi “Muludan”
sing mapan ing sa-lore makam Nyai Ageng Ngerang. Panggonan kuwi mau salah siji
bukti katresnane Nyai Ageng Ngerang marang Rasulullah SAW yakuwi panggonan Nyai
Ageng Ngerang maca lan nyanyekake irama Maulid an-Nabbi (laire Nabi) lan mujahadah (bener-bener sajroning
ibadah). Mula Nyai Ageng Ngerang oleh julukan “Sang Pecinta Maulid”
Nyai
Ageng Ngerang kuwi saka Kerajaan Majapahit, nalika wektu pemarintahan dicekel
dening Raja Brawijaya (Prabu Kertabumi). Raja Brawijaya nurunke Raden Bondan
Kejawen (Lembu Peteng) lan Raden Bondan Kejawen duwe bojo jenenge Dewi Nawang
Sih putri saka Dewi Nawang Wulan lan Ki Jaka Tarub (Kidang Telangkas).
Raden
Bondan Kejawen nurunke putra telu yaiku Syaikh Ngabdullah sing dikenal nganggo
jeneng Ki Ageng Wanasaba. Putra nomer loro jenenge Syaikh Abdullah sing dikenal
Ki Ageng Getas Pendawa lan putri nomer telu jenenge Siti Rohmah Roro Kasihan
utawa sing luwih asring diundang Nyai Ageng Ngerang. Lan amarga Nyai Ageng
Ngerang kuwi putu sing wadon dewe mangka si mbahe yakuwi Dewi Nawang Wulan lan
Ki Jaka Tarub maringi warisan arupa Slendang
Kemben.
Juragan Bandi katon kanthi kejem nyeret
Sumirah sing ayu banget. Sumirah ngrintih nangis njaluk dicolke lan
diijinke balik marang wong tuane. Nanging Juragan Bandiora gelem. Tuture
Juragan Bandi, Sumirahiku bojone. Kanggo Juragan Bandi garwa iku sigaring
nyawa.
Neraka manut surga
katut. Anan ngendi wae Juragan Bandi lunga, Sumirah kudu melu. Nanginng
omonge Sumirah, Sumirahora gelem melu
ning papan judi lan mabuk. Wonge wis ora gelem dadi ajang taruhan bojone. Sumirah
isa lunga, ngrintih lan mlayu karo jaluk pitulungane para warga. Warga sing
ning sawah krungu jerite Sumirah langsung kumpul banjur ngindungi Sumirah. Juragan Bandi nesu banget weruh
warga sing pengen nglindungi Sumirah.
Karo ati sing kalap Juragan Bandi
nantang warga. Dadi tarung antara warga karo Juragan Bandit. Nanging
Juragan Bandi banget sakti. Lagi sedela wae kabeh warga sing nglawan
bisadikalahke. Juragan Bandi meksa Sumirahy melu dheweke meneh.
Ndadak ana swara ringkikan jaran lan angin puting beliung sing banter banget.
Kabeh godhong garing padha miber. Warga mesem seneng! Nyai Ageng Ngerang teka!
Nyai Ageng Ngerang teka! Ya! Salah siji tanda karomah Nyai Ageng Ngerang teka
mesti dituti angin, saliyane jaran gagah sing diarani Jaran sembrani. Ora suwe
banjur Nyai Ageng Ngerang mudhun karo tenang lan santun. Praupane ayu banget
lan glebetan slendhang ing sirahe. Nyai Ageng Ngerang jaluk marang Juragan
Bandi supaya ora kasar karo bojone. Nalika Nyai Ageng Ngerang maca hadiskanthi
tenanan, Juragan Bandi ngamuk lan ngomong Nyai Ageng Ngerang ora nabi. Kanggo
apa nasehati banjur ngusir Nyai Ageng Ngerang. Nyai Ageng Ngerang nyuwun marang
Juragan Bandi supaya ngajak Sumirah lunga menyang dukun bayi. Nanging Juragan
Bandi nolak. Pokoke Juragan Bandi bakal ngajak Sumirah ing warung kopi didadeke
taruhan. Apa gunane duwe bojo ayu yen ora dimanfaatke, iku alasane Bandi.
Juragan Bandi ngamuk lan nantang Nyai Ageng Ngerang. Juragan Bandi ngenyek Nyai
Ageng Ngerang wanita iku kanca wingking Nyai aja sok. Akhire dadi perang
antarane Nyai Ageng Ngerang karo Juragan Bandi. Nyai Ageng Ngerang nggunakake
slendang pusaka sing jenenge slendang Widodari warisan saka mbahe Dewi Nawang
Wulan. Slendang nyamber awake Juragan Bandi nganti mencelat aduh. Juragan Bandi
katon kelaran lan dendam banget karo Nyai Ageng Ngerang. Nyai Ageng Ngerang
ngendika:
“Juragan Bandi kudu janji ora nyiksa Sumirah.”
Sumirah ngomong:
“aku pengen pegat. Aku wis ora betah dadi bojone Juragan Bandi.”
“aku bakal megat kowe, aku ora bakal
ngakoni anak sing ana ing knadunganem iku anakku.” Juragan Bandi njawab karo nesu.
Banjur Juragan Bandi lunga ninggalke
Sumirah ngono wae lan ngomong “kowe wis
dadi randa”.
Saiki Sumirang mapan ing pesantrene Nyai
Ageng Ngerang. Wonge golek ilmu agama kanthi taat. Nyai Ageng Ngerang nerangke
yen salah siji hal sing digething Allah ing donya iki yaiku pegatan. Pegatan
iku dalan akhir nalika wong wadon bener-bener didzolimi.Sumirah nangis, nanging
katon ikhlas. Nyai Ageng Ngerang Nyuwun marang jamah ibu-ibu supaya njaga rumah
tanggane. Njaga sholat 5 wektu, pasa wulan ramadhan, njaga kehormatane, taat
marang garwane. Insyaallah bakal dilebokke surgane Gusti Allah.Nyai Ageng
Ngerang Ngerang ngewanti-wanti para jamaah wanita supaya muliaake garwa.
Sawise rampung, warga bubar banjur Nyai
Ageng Ngerangnemoni Ki Ageng Ngerang. Katon Ki Ageng Ngerang nembe siap-siap
arep linga keliling taanah Jawa kanggo nglakokake syiar bareng karo para santri
putra miturut amanah saking bapake Syaikh Maulana Malik Ibrahim. Kanthi hormat
Nyai Ageng Ngerang ngambung tangane garwane lan maringke bekal. KiAgeng Ngerang
meling marang Nyai Ageng Ngerang supaya tetep terus nglanjutke syiar. Sumirah
uga saiki seneng banget, saiki wonge tenang awit pisah karo juragan Bandi, oraa
dilarani kaya biasane meneh.
Sementara kuwi ing warung remang, Juragan
Bandi katon nyebarke fitnah.
“aku pegat karo Sumirah iku marga Nyai Ageng Ngerang wis ngajari sumirah
nglawan bojo.”
Akeh wong lanang sing kehasut karo omongane
Juragan Bandi nganti Kang Badrun jajni bakal menggak bojone ngaji karo Nyai
Ageng Ngerang meneh. Miturut Juragan Bandi, Nyai Ageng Ngerang ngajari aliran
sesat marang warga.
Ratmini, bojone Kang Badrun katon lagi
balik saka ngaji. Badrun katon ngamuk lan awit saka iku ngancem Ratmi supayora
ngaji meneh supaya ora sesat lan wani karo wong lanang. Ratmi njelaske yen Nyai
Ageng Ngerang ngajari apik. Badrun ngomong:
“yen kowe ngaji meneh, aku bakal masung kowe.”
Ratmini ngomong wonge njaluk ijin ngaji amarga
pengen jabang bayine bakal dadi anak sing soleh yen lahir. Badrun ngomong:
“kowe aja seneng disik, yen bayi sing lahir iku wadon, aku bakal mbuak bayi
iku ana kali. Aku mung pengen anak lanang amarga anak wadon iku mung gawa sial
lan ora isa ngewangi golek duwit”
Ratmi katon sedhih banget. Badrun balik
menyang pangkalan judi. Ndadak wae wetenge Ratmini krasa lara. Warga sing wruh
keadaane Ratmi langsung gawa marang Mbok Madyo, dukun beranak karo bendi.
Nanging lagi tekan ing ngarep pesantren Nyai Ageng Ngerang, Ratmi wis ora kuat.
Warga banjur ngedunke Ratmi. Cepet-cepet Nyai Ageng Ngerang ngewangi Ratmi
nglairke. Ora suwe anak wadon lahir. Ora seneng nanging malah nangis. Ratmi
ngomong yen Baddrun wis ngucap sumpah bakal matenio bayi iku yen lair wadon.
Ing pangkalan judi Badrun oleh kabar,
Ratmi wis nglairake anak wadon nanging ana ing pesantren Nyai Ageng Ngerang.
Badrun kobong, banjur ndang cepet mara ing pesantrene Nyai Ageng Ngerang.
Kanthi ati kalap Badrun njaluk marang Ratmi supaya ngewehke anake. Swasana
heboh lan Nyai Ageng Ngerang nglarang Badrun mbuak anak iku. Nyai Ageng Ngerang
ngendika:
“Haram hukume buang anak amarga wedi mlarat. Allah SWT berfirman: Lan aja
nganti kowe matenii anak-anamu amarga wedi mlarat. Aku sing ngewenehi rejeki
marang kabeh lan kowe. Sejatine mateni anak kuwi temasuk dosa sing gedhe,
(Al-Asraa’ : 31)”
Nanging Badrun ora perduli, saengga
kedadeyan geret-geretan bayi antarane Badrun lan Ratmi. Karo kharomah Nyai
Ageng Ngerang ndadak bayi sing digawa
Ratmi pindah ing tangane Nyai Ageng
Ngerang. Badrun nyoba ngrebut. Karo kharomahe, Nyai Ageng Ngerang bisa
kanthi gampang mlebat, mumbul njaga bayi iku. Badrun tambah kalap lan geret
kapak nggudak bayine. Wonge mbabi buta nganti ora sadar nugelke wit gedhe lan
ngenegi awake dhewe. Badrun katon kelaran lan tatu parah. Nyai Ageng Ngerang
ngendika marang Ratmi supaya ngrawat Badrun, nanging Ratmi ora gelem amarga wis
lara ati karo kelakuane Badrun. Nyai Ageng Ngerang ngendika:
“dadeke bojo kuwi dalan tumuju suwarga, baktia marang bojo, lawang hidayah
mesti bakal Allah paringi marang Badrun.”
Atine
Badrun geter krungu ngendikaneNyai Ageng Ngerang. Wonge nangis njaluk
ngapura marang Ratmi lan janji bakal dadi bojo sing apik. Ratmi kanthi kebak
welas asih ngapura Badrun.
Juragan Bandi murka banget bareng ngerti
yen Badrun saiki wis taubat. Wonge ngrasa yen Nyai Ageng Ngerang wis akeh
nyebarake ajaran sing dianggep Juragan Bandi sesat marang wong sacedake.
Wengin, katon Juragan Bandi meneng-meneng nguncalke geni ing langgar Nyai Ageng
Ngerang. Nalika iku Nyai Ageng Ngerang lagi dzikir sawise sholat Tahajud karo
Sumirah lan santriwati kaget ngrasake geni sing ana ing ing langgar. Nanging
Nyai Ageng Ngerang ngendika “Allah Maha
Ngatiske geni”
Nyai Ageng Ngerang ngajak para santri metu.
Geni wis awit ngobong lan para warga mara kaget weruh Juragan Bandi isih wae
nguncalke geni ing langgar. Warga ngamuk banjur nangkep Juragan Bandi amarga
wis ngrusak papan ibadahe. Warga uga bingung amarga ora ana banyu amarga
ngepasi mangsa ketiga. Kanthi rasa tenang Nyai Ageng Ngerang ngleremke geni
karo slendang kemben widodarine. Ndadak Juragan Bandi ngecolke awake lan mlayu
ing alas ninggalke papan iku.
Tanpa sadar Juragan Bandi mlayu adoh ana
jero alas. Ndadak wae ana macan sing ganas ing ngarepane. Saking kagete,
Juragan Bandi njungkel lan macan iku mau nyerang kena wetenge nganti suwek ora
duwe daya. Ujug-ujug teka angin puting beliung kaya adate lan Nyai Ageng
Ngerang wis ana ing ngarepe. Nyai Ageng Ngerang maos Bismillah lan nyekel
sirahe macan iku saengga bisa ditundukke kanthi gampang.
Juragan Bandi ngomong:
“ilmu sihir apa dinggo Nyai Ageng Ngerang kanggo nundukke kewan ganas iku?”
Ngendikane Nyai Ageng Ngerang salah siji
rahasia nundukke kewan ganas lan kewan liyane marang wong sing takwa karo
perintahe Allah SWT. Saiki Juragan Bandi krasa isin amarga wis bola-bali Nyai
Ageng Ngerang ngapurani salahe. Juragan Bandi katon lemah, wonge pengen taubat
lan ngaji karo Nyai Ageng Ngerang. Nanging Nyai Ageng Ngerang ngendika:
“Yen njenengan wis mari, bakal dakajari.”
Nanging tatune Juragan Bandi wis kadung
parah. Juragan Bandi mati amarga kurangen darah.
Saiki ing ngarepe warga Nyai Ageng
Ngerang katon terus maringke
ceramahe. Nyai Ageng Ngerang ngajak
kabeh warga, terutama marang ibu-ibu supaya dadi hamba Allah sing taat lan dadi
dhusun “Baldatul Warobbun Ghofur” (dhusun
sing paik, aman, lan nyaman sarta diridhoi kaliyan Allah SWT lan manfaat sarta
bermartabat ing donya lan akhira). Warga saka daerah liya saya akih sing ngaji
marang Nyai Ageng Ngerang. Nyai Ageng Ngerang ora mung ngajari ngaji nanging
uga maringi akeh ketrampilan, kayata mbatik. Nyai Ageng Ngerang ngendika:
“Wanita uga bisa ngrewangi golek nafkah kanggo keeluwarga, tanpa ngilangi
fitrah dadigarwa lan ibu.”
Berita yen Nyai Ageng Ngerang kuwi
minangka waliyullah wanita sing ayu lan akih duwe kharomah saka desa Ngerang
Tambakromo nganti tekan ngendi-ngendi. Kabeh padha ngomongke Nyai Ageng Ngerang
sing biyen jenenge Siti Rohmah Roro Kasihan. Nyai Ageng Ngerang pancen kebak
welas asih marang sapa wae. Sosok Nyai Ageng Ngerang kuwi wong kang suci,
keturunan bangsawan/darah biru lan uga waliyullah (kekasih Allah).
Kehebatane Nyai Ageng Ngerang karo
kharomah slendang widodari warisan mbahe Nawang Wulan garwane Ki Jaka Tarub
(Kidang Telangkas) krungu nganti tekan kupinge Nyai Wereng. Nyai Wereng kuwi
salah siji wanita sing sekti ing desa Tambak Bayan yaiku guru ilmu hitam. Akeh
banget muride sing meguru. Saliyane dadi guru ilmu hitam, Nyai Wereng uga
asring gawe rajah, santet kanggo sapa wae sing bakal nulungi wonge. Nyai Wereng
bingung, pirang-pirang dina iku ora akeh wong sing mara meneh marang dheweke.
Banjur Nyai Wereng ngundang salah siji muride Nyi Jriyah. Nyi Jriyah ngomong:
“wong-wong sing biyen asring mara ing padepokan saiki wis akeh sing mlebu
Islam lan megur marang Ki Ageng Ngerang lan Nyai Ageng Ngerang”.
Dadane Nyai Wereng krasa panas, wonge
pengen ngerti kaya apa Nyai Ageng Ngerang. Meneng-meneng Nyai Wereng ngajak Nyi
Jriyah mara ing pesantren Nyai Ageng Ngerang. Nyai Wereng nyamar dadi pengemis
mlarat bareng karo Nyi Jriyah. Padahal Nyai Wereng sabenere mung pengen njajal
kasektene Nyai Ageng Ngerang lan narik kabeh santri ing pesantren Nyai Ageng
Ngerang supaya gelem dadi muride.
Biyen Nyai Wereng bakal dadi wong sing
mumpuni yen bisa diwe murid cacahe 1000. Weruh santri ing papane Nyai Ageng
Ngerang akeh banget lan kabeh ngurmati Nyai Ageng Ngerang, Nyai Wereng saya
tambah pengen ngalahke Nyai Ageng Ngerang karo ilmune. Nyai Wereng karo gombal
sing ora sepo nyuwun welas asih marang Nyai Ageng Ngerang. Kanthi tulus Nyai
Ageng Ngerang maringi sedekah marang Nyai Wereng.
Nyai Wereng balik menyang padepokane lan
nyusun rencana supaya bisa ngalahke Nyai Ageng Ngerang. Meneng-meneng Nyai
Ageng Ngerang ngirim santet lan
teluh parang para muride Nyai Ageng Ngerang sing lagi ngaji. Nyai Wereng
yakin Nyai Ageng Ngerang ora bisa nambani amarga santet lan teluh sing
dikirim kuwi santet sing paling ampuh, sing bakal gawe kabeh santri dadi
kebakar lan ngrasakake lara kulit sing banget larane.
Nalika para santri lagi ana ing kebon,
kabeh santri pada pating njlerit kelaran. Kulite pada mlepuh, Nyai Ageng
Ngerang kaget banjur para santri pada dikumpulke lan kanthi khusyuk donya.
Nyai Ageng Ngerang ngobati karo lan ngusapi nganggo banyu. Ora suwe
banjur ora suwe para santri pada mari.
Nyai Wereng ngamuk krungu marga apa sing
dikirimke kanthi gampang dikalahke karo Nyai Ageng Ngerang. Nyai wereng mikir
nganit judeg, akhire Nyai Wereng nantang Nyai Ageng Ngerang perang. Nalika
Sumirah, muride Nyai Ageng Ngerang lagi ana ing sendang, Nyai Wereng nyulik lan ninggalke pesen.
“Yen Sumirah pengen urip, Nyai Ageng Ngerang kudu njupuk Sumirah ing
padepokanku”
Nyai Ageng Ngerang kaget krungu
kabar yen Sumirah diculik dening Nyai Wereng. Karo kharomahe, Jaran Sembrani
Nyai Ageng Ngerang sacepet kilat nyusul Nyai Wereng. Angin puting metu
pertanda yen Nyai Ageng Ngerang teka. Nyai Ageng Ngerang nggoleki ana
ngendi papane Sumirah. Jebul Sumirah ditaleni ing wit ing ngarep padepokan.
Nalika Nyai Ageng Ngerang teka, Nyai Wereng ngomong:
“aku bakal ngeculke
Sumirah yen kowe gelem ngijoli karo
Slendang Kemben Widodari sing sekti iku.”
Nyai Ageng Ngerang nolak, amarga
slendang iku amanah saka leluhure. Nanggo slendang iku mau, Nyai Ageng
Ngerang isa ngambakke syiar ing bumi ngendi wae. Nyai Wereng tambah
ketantang langsung nglawan Nyai Ageng Ngerang nganggo ilmu hitame.
Slendang Kemben diantemke ing duwur dening Nyai Ageng Ngerang, banjur metu
cipratan geni kaya petir sing nyamber. Nyai Wereng mbales karo geni sing luwih
gedhe meneh. Kalorone tarung padha kuate. Nyai Wereng nganggo ilmu hitame gawe
ula sing duwe racun lan diuncalke marang Nyai Ageng Ngerang. Nyai Ageng
Ngerang nangkep ula mau karo tenang lan saka ijin Allah, ula mau dirubah
dadi debog gedang. Weruh kabeh iku mau Nyai Wereng dadi kalap lan nyoba nggeret
slendang kemben widodari lan arep diobong supaya kharomah Nyai Ageng Ngerang
ilang. Nanging nalika iku uga geni balik ing awake Nyai Wereng, banjur kobong
lan kelaran. Nyai Wereng tiba, awake krasa lumpuh lan kaku. Ora isa diobahke
babar pisan, nganti ngomong wae ora isa. Nyai Wereng nangis sedhih.
Karo kebak rasa tulus Nyai Ageng
Ngerang nyuwun marang Nyai Wereng:
“Nyai Wereng taubat, lan culke kabeh ilmu hitam sing kosinaoni nganti iki.
Yen sampeyan purun aku bakal ngobati Nyai nganti mari kaya asale maneh lan
ayune sam-peyan bakal balik.”
Nyai Wereng sing ora duwe daya nerima
kabeh sarane Nyai Ageng Ngerang. Katon Nyai Ageng Ngerang lan santriwatine
lagi ngaji bareng. Katon ing kono uga Nyai Wereng lan Nyi Jariyah wis dadi
santriwati nganggo kudung. Anak buahe Nyai Wereng uga wis ngaji bareng-bareng.
Nalika
semana Nyai Ageng Ngerang urip ana ing kerajaan sing akeh banget syarat lan
aturan sing ana ing Kerajaan Majapahit. Nyai Ageng Ngerang lunga saka
KerajaanMajapahit amarga pengen syi’ar agama Islam amarga jaman semana jarang
banget wong sing ngerti ajaran agama Islam lan ngadoh saka Kerajaan Majapahit
supaya bener-bener nemokake kahuripan sing hakiki uga diridhoi Allah SWT. Nyai
Ageng Ngerang uga pindah ngasing supaya dakwah mbumekake agama Islam. Nyai
Ageng Ngerang uga pernah mampir ing daerah Kayen, yaiku ing lingkungan Gua
Pancur lan Gua Wareh. Nyai Ageng Ngerang uga tau mampir ing tanah Muria, banjur
pungkasane Nyai Ageng Ngerang oleh wilayah sing layak lan ngepas sasarane
kanggo dakwah yaiku ing lereng Gunung Kendeng pase ing Dusun Ngerang Tambakromo,
Kecamatan Tambakromo Kabupaten Pati Jawa Tengah.
Nalika
Nyai Ageng Ngerang kumpul lan musyawarah bareng karo para Auliya lan Penggede
wektu iku. Ing acara kanggo nentokake langkah lanjut sajroning misi dakwah sing
wis dilakoni sasuwene iku. Nyai Ageng Ngerang kadang diremehke amarga mung wong
wadon. “Wong wadon kuwi papane ing ngomah
lan ora bisa lapo-lapo. Bageyane wong wadon kuwi mung sithik, setengah saka
bageyane wong lanang, beda karo anane bageyan wong lanang sing isih utuh
dibandingke karo wong wadon. Jangkahe wong wadon kuwi sempit lan ora bisa oleh
wilayah kekuwasaan sing amba.”
Nalika
iku uga Nyai Ageng Ngerang lansung ngobong Slendang
Kembenwarisan saka Dewi Nawang Wulan lan Ki Jaka Tarub. Nyai Ageng Ngerang
ngomong:
“Langes (awu) saka
bakaran Slendang sing digawa angin, ana ing ngendi wae papan tibane langes kuwi
bakal dadi Bumi Ngerang lan ora ana sing bisa kuat manggoni bumi kuwi kecuali
anak putuku sarta keturunanku”
Weruh
kedadeyan apa sing wis dilakoni Nyai Ageng Ngerang, para sedulur-sedulure uga
ora gelem kalah kaya apa sing wis dilakoni Nyai Ageng Ngerang, mangka ora mikir
akeh lan dawa para sedulure kalebu mbahe Sunan Muria banjur ngobong klambine.
Ana ngendi wae langes bakaran klambi kuwi tiba, mangka bakal dadi Bumi Muria. Mula
iku, Bumi Ngerang lan Bumi Muria ana ing ngendi-ngendi. Bumi Ngerang lan Bumi
Muria ora ana sing kuat manggoni lan nggunakake, amarga akeh masalah urip sing
diadepi kecuali sing nganggoke kuwi anak putu lan keturunane Nyai Ageng Ngerang
lan Sunan Muria.
Nalika
dakwah nyebarke agama Islam, Nyai Ageng Ngerang ngalami cuba lan alangan
nanging kabeh mau ora gawe Nyai Ageng Ngerang nyerah utawa putus asa amarga
lelaku nyebarke agama Islam iku pancen angel banget, sarta ujiane, alangan wis
mesti ngenteni ning ngarep.
Hijrah
Nyai Ageng Ngerang mandeg ana ing daerah sing durung kecekel ajaran-ajaran sing
nduweni agama. Ana ing Dusun Ngerang Kecamatan Tambakromo Kabupaten Pati , Jawa
Tengah. Nyai Ageng Ngerang mbangun masjid uga padepokan lan papan kanggo supaya
bisa istiqomah nalika dakwah. Papane ana
ing muludan , saiki ana ing saklore
makam makam Nyai Ageng Ngerang.
Makam
Nyai Ageng Ngerang ana ing Dusun Ngerang Kecamatan Tambakromo Kabupaten Pati,
lemah sing di nggo makam Nyai Ageng Ngerang
iku disebut Sentono (lemah
kerajaan), amarga nalika semana papan iku yakuwi salah sijine kerajaan nalika
jamane Nyai Ageng Ngerang.
Jasa
Nyai Ageng Ngerang samlebune nyebar agama Islam ana ing Nuswantara iku kabukti
karo marake para zairin lan zairot (peziarah) sing ngarepake berkah saka
penjuru ing Indonesia. Lelaku Nyai Ageng Ngerang nyebarke Agama Islam bisa
dadi suri tauladan sing apik kanggo
generasi enom.
Saben
tanggal 1 Sura (malam tahun anyare Islam) mesthi diperingati minangka puncak
Haul Nyai Ageng Ngerang. Peringatan iku dilaksanakake kanthi regeng amarga sing
mara ing kono ora mung warga lan daerah kono wae, nanging uga diramekake karo
para ziarah sing mara saka kabeh penjuru ing Indonesia. Termasuk keturunan Nyai
Ageng Ngerang saka Keraton Surakarta Hadiningrat sarta rombongan. Saben Haul,
rombongan saka Keraton Surakarta Hadiningrat mesthi mara kanggo ngramekake lan
dongakake Nyai Ageng Ngerang supaya diparingi papan sing layak ana ing sisihe
Gusti Allah SWT.
Janji
Nyai Ageng Ngerang nalika isih ana yaiku sapa wae wong, luwih-luwih anak lan
putune, ana ing ngendi wae yen duwe pepinginan sing apik lan tulus saka ati
ndongakake lan ngrumat Nyai Ageng Ngerang sarta tawasul marang Gusti Allah,
pramila Nyai Ageng Ngerang ora bakal lali lan dongakake marang Allah supaya
kabeh maksut lan tujuwan urip luwih-luwih ing akherat bisa dihijabah kaliyan
Gusti Allah.
Bareng
karo anane makam Nyai Ageng Ngerang ing Dusun Ngerang Kecamatan Tambakromo
Kabupaten Pati, Jawa Tengah iku gawe majune Dusun Ngerang kanggo kabeh bab
pembangunan luwih-luwih bab spiritual. Saengga Dusun Ngerangdadi Dusun sing
diimpen-impen saben wong yaiku dusun sing apik, aman, nyaman sarta diridhoi
Allah SWT lan manfaat sarta martabat ana ing donya uga ing akherat.
Ana
ing dusun iku, ana gapura sing dadi lawang mlebu Dusun Ngerang Tambakromo lan
dadi pusat ramene nalika Haul Nyai Ageng Ngerang sing dilaksanakake tanggal 1
Sura. Gapura iki sing dilewati naalika kirab luwur Nyai Ageng Ngerang sing
diwiwiti saka balai Desa Tambakromo nganti makam Nyai Ageng Ngerang.
SARASILAH NYAI AGENG NGERANG
Miturut
katrangan saka sumber-sumber sing ana, uga saka Kraton Surakarta Hadiningrat
Nyai Ageng Ngerang nduwe jeneng asli Siti Rohmah Roro Kasihan, bareng nikah
karo Ki Ageng Ngerang 1 jenenge ganti jeneng
dadi Nyai Ageng Ngerang iku.
Biyen
ana salah siji raja jenenge Raja Brawijaya V (Prabu Kertabumi) sing nikah karo
salah siji putri jenenge Dewi Wandan Kuning lan nduwe putra jenenge Raden
Bondan Kejawen (Lembu Peteng). Raden Bondan Kejawen nikah karo putri saka Dewi
Nawang Wulan lan Ki Jaka Tarub sing jenenge Nawangsih. Saka nikahe iku mau,
duwe putra 3 yakuwi Ki Ageng Wonosobo, Ki Ageng Getas Pandhawa, lan Roro
Kasihan (Nyai Ageng Ngerang).
Ki
Ageng Wonosobo kuwi panutan ing mangsa uripe. Jeneng asline yaiku Kyai Ageng
Ngabdullah, sedukur kandunge Nyai Ageng
Ngerang sing mbarep. Makam Ki Ageng Wonosobo saiki ana ing daerah Kabupaten
Wonosobo, yakuwi ing Desa Plobangan Selo Merto.
Ing
mangsa uripe, Ki Ageng Wonosobo uga dadi pemimpin sing kondhang, wibawa lan
kharismatik. Ki Ageng Wonosobo uga dikenal wargaa sekitar karo sebutan Ki Ageng
Dukuh, nanging ing desa Plobangan Selo Merto kuwi, tiyange dikenal karo sebutan
Ki Wanu/Ki Wanusebo. Perbedaan jeneng kuwi mung amarga dialek Daerah Wonosobo
kegawa dialek Banyumas.
Ki Ageng Wonosobo dipercaya lan diyakini
minangka waliyullah uga wis ngulandara ana ing pirang-pirang panggonan kanggo
golek ilmu lan nyiarke Agama Islam. Ki ageng Wonosobo duwe anak sing jenenge
Pangeran Made Pandan jeneng liya saka Ki Ageng Pandanaran. Pangeran Made Pandan
dewe uga duwe anak sing jenenge Ki Ageng Pakiringan lan Ki Ageng Pakiringan
duwe bojo sing jenenge Rara Ayu Janten. Saka nikahe iku mau, Ki Ageng
Pakiringan duwe anak papat yakuwi Nyai Ageng Laweh, Nyai Ageng Manggar, Putri
lan Ki Juru Mertani.
Ki
Ageng Getas Pandhawa uga pemimpin sing sederhana banget, nanging dadi panutan
ing mangsane. Jeneng asline yaiku Syaikh Abdullah utawa akeh sing ngundang karo
sebutan Raden Depok. Ki Ageng Getas Pandhawa yaiku sedulur kandung Nyai Ageng
Ngerang , yakuwi kakang nomer lorone Nyai Ageng Ngerang sawise Ki Ageng
Wonosobo. Ki Ageng Getas Pandhawa kuwi penyebar agama Islam sing kondhang,
wibawa lan karismatik sarta sederhana banget ing urip lan kauripane
sedina-dina.
Ki
Ageng Getas Pandhawa kuwi sosok pemimpin sing sederhana, nanging wonge tegas
banget lan wibawa, saengga disenengi lan dihormati wong akeh. Amarga kesederhanaane
kuwi, kesederhanaane lan kepemimpinane iku disebut Ki Ageng Getas Pandhawa.
Tiyange tangguh banget lan konon kuat banget nalika riyadhoh/tirakat kanggo
ngolah batin, supaya bisa cedhak marang
Gusti Allah SWT kanthi maksimal lan khusuk. Kabeh iku mau dilakoni karo karep
sing gedhe bisa nenangke awak lan m,uhasabah/ngoreksi awake dhewe, semana uga
bisa nyebarke agam Islam kanthi ikhlas, tulus golek ridho Allah SWT, saengga
bisa kawujud kekarepane. Makam Ki Ageng Getas Pandhawa dihormati lan
dikeramatke dening warga ing Desa Kuripan Purwodadi Grobogan Jawa Tengah.
Ki
Ageng Getas Pandhawa duwe anak, sing mbarep jenenge Li Ageng Selo sing dikenal
karo sebutan “Sang Penangkap Petir”.
Anak nomer loro jenenge Nyai Ageng Pakis, anak nomer telu jenenge Ki Ageng
Purna, anak nomer papat jenenge Ki Ageng Kare, anak nomer lima jenenge Ki Ageng
Wanglu, anak nomer enem jenenge Ki Ageng Bokong lan anak sing nomer pitu
jenenge Ki Ageng Adibaya.
KiAgeng
Selo dewe duwe anak jenenge Ki Ageng Enis lan Ki Ageng Enis uga duwe anak
jenenge Ki Ageng Pemanahan. Makam Ki Ageng Selo ana ing Desa Selo Tawangharjo
Purwodadi Jawa Tengah. Makam Ki Ageng Selo sanget dihormati lan di keramatke
warga kono, saben wayah mesthi ditekani peziarah-peziarah saka pirang-pirang daerah,
saengga rame lan marake makam Ki Ageng Selo saka wong-wong sing ngarepke berkah
Allah SWT karo wasilah (lantaram/sarana) saka Ki Ageng Selo (mantu Nyai Ageng
Ngerang).
Nyai
Ageng Ngerang nikah karo Ki Ageng Ngerang I, saka cerita sing ana Ki Ageng Ngerang
kuwi putra saka Syaikh Maulana Malik Ibrahim. Nyai Ageng Ngerang duwe pertalian
lair lan batin karo raja-raja lan guru besar Agama Islam sing mandeg ing Raja
Brawijaya V (Raja Majapahit) utawa Prabu Kertabumi. Nyai Ageng Ngerang
diwenenhi jeneng iku mau amarga bojone jenenge Ki Ageng Ngerang I. Saka nikahe
mau Ki Ageng Ngerang I lan Nyai Ageng Ngerang duwe putra loro, siji lanang lan
siji wadon. Sing nomer 1 yakuwi wadon nanging durung ana sing ngerti sapa
jelase jenenge. Putra nomer siji kuwi mau nikah karo Ki Ageng Selo, putra saka
Ki Ageng Getas Pandhawa.
Sing
nomer loro yaiku lanang, Ki Ageng Ngerang II sing terkenal karo sebutan Ki
Ageng Pati. Putra sing nomer loro duwe anak papat yaiku Ki Ageng Ngerang III,
Ki Ageng Ngerang IV (Sunan Ngerang), Ki Ageng Ngerang V (Ki Bagus Ngerang), lan
sing terakhir Pangeran Kalijenar.
Ki
Ageng Ngerang III makame ana ing Laweyan Solo Jawa Tengah. Ki Ageng Ngerang III
iki sing wis nurunke Ki Ageng Penjawi. Ki Ageng Penjawi yaiku wong sing tau
dadi adipati Kadipaten Pati sawise gugure Arya Penangsang. Arya Penangsang iku
Adipati Jipang Panolan lan putra saka Pangeran Sedalepen.
Ki
Ageng Penjawi sanget berjasa numpas pemberontak sing dilakoni sakelompok Laskar
Soreng sing dipimpin Arya Penangsang. Kabeh mau ana tujuan supaya mateni kabeh
keturunan Sultan Trenggana, amarga lara ati. Ki Ageng Penjawi nalika iku dadi
Panglima perang bareng karo Danang Sutawijaya, Ki Juru Mertani lan Ki Ageng
Pemanahan. Wong telu iku mau dikenal karo sebutan “Tiga Serangkai”. Pungkasane
Ki Ageng Penjawi lan Danang Sutawijaya bisa ngalahke Arya Penagsang lan bala
tentarane lan oleh hadiah Kutha Pati sing wis ana penduduke.
Nyai
Ageng Ngerang dewe kuwi anak ragile Raden Bondan Kejawen (Lembu Peteng) saka
nikaahe karo Dewi Nawangsih. Bapake Nyai Ageng Ngerang dewe isih seduluran karo
Raden Patah, nanging beda ibu. Raden Patah yaiku wong sing pertama kali dadi
Sultan nalika kerajaan Islam pertama ing pulau Jawa yaiku Kasultanan Demak
Bintoro. Raden Patah duwe gelar “Akbar Alfath” Raden Patah uga anake Raja
Brawijaya V karo ibu keturunan Champa.
Saka
nikahe Raden Bondan Kejawen karo Nawangsih wis nurunke anak telu. Sing nomer
siji syaikh Ngabdullah sing saiki terkenal karo sebutan Ki Ageng Wonosobo, lan
anak nomer loro yaiku Syaikh Abdullah sing terkenal karo sebutan Ki Ageng Getas
Pandhawa lan anak ragile yaikub Siti Rohmah Roro Kasihan sing dikenal karo Nyai
Ageng Ngerang.
Hubungane
Nyai Ageng Ngerang karo Sunan Muria yaiku Sunan Muria yaiku Sunan Muria ora
mantu Nyai Ageng Ngerang nanging putu mantu Nyai Ageng Ngerang. Saka cerita,
Sunan Muria iku putrane Sunan Kalijaga kaliyan Dewi Saroh binti Maulana Ishaq,
padahal putrine Sunan Kalijaga sing jenenge Raden Ayu Panengah iku dadi garwane
Ki Ageng Ngerang III, lan Ki Ageng Ngerang III iku putu Nyai Ageng Ngerang.
Nyai
Ageng Ngerang nurunke adipati (bupati), nurunke raja-raja Mataram Islam,
raja-raja ing Pajang, Jipang lan Keraton Hadiningrat sing nganti saiki durung
seda yaiku Paku Buwono XIII (Kanjeng Gusti Pangeran Haryo Hangabehi).
Nyai
Ageng Ngerang nurunke Bupati ing Pati, yaiku:
1. Ki
Ageng Penjawi (1568-1577) sarampunge Aryo Penangsang seda oleh Panembahan
Senopati (Danang Sutawijaya).
2. Raden
Syidik putra Ki Ageng Penjawi sing duwe gelar Djaya Kusuma I (1577-1601)
3. Djaya
Kusuma II sing gelare Adi Pragola I (1601-1628)
4. Ki
Arya Pagedongan/Penjaringan sing duwe gelar Adipati Pragola II (1628-1640)
5. Adipati
Pragola III, ora ana pemerintahan nanging diganti karo katumenggungan lan 7
Kademangan.
Nyai
Ageng Ngerang iku putra paling cilik saka Raden Bondan Kejawen (Lembu Peteng)
saka nikahe karo Dewi Nawangsih putra saka Ki Jaka Tarub lan Dewi Nawang Wulan.
Makam Ki Jaka Tarub ana ing Desa Tawangharjo Purwodadi Jawa Tengah.
Dewi
Nawangsig wis nurunke Nyai Ageng Ngerang sing nikah kari Ki Ageng Ngerang I.
Raden Bondan Kejawen iku putra saka Raja Brawijaya V nalika tahun 1468-1478.
Bapak
saka Nyai Ageng Ngerang isih sedulur karo Raden Patah nanging beda ibu. Raden
Patah uga putra saka Raden Brawijaya V karo keturunan Champa, saiki perbatasan Kamboja
lan Vietnam.
Hubungan
Nyai Ageng Ngerang karo Sunan Muria,
Suanan Muria kuwi ora mantu Nyai Ageng Ngerang nanging putu mantu Nyai
Ageng Ngerang. Amarga ana sing cerita nek Sunan Muria iku putrane Sunan
Kalijaga karo Dewi sarohbinti Maulana Ishaq, padahal putri Sunan Kalijaga sing
jenenge Raden Ayu Panengah kuwi dadi bojone Ki Ageng Ngerang III, lan Ki Ageng
III kuwi putune Nyai Ageng Ngerang.
KERAMAT NYAI AGENG NGERANG
Sebelah
kidul makam Nyai Ageng Ngerang ana papan sing mistis sing diarani “Phunthuk”, iku papan sing dinggo tapa,
meditasi lan munajat Nyai Ageng Ngerang marang Gusti Allah SWT karo tekad sing
bener-bener, saengga oleh katenangan jiwa lan drajat sing agung ing sisihe
Gusti Allah. Ing punthuk iku duwe hawa mistis sing gedhe banget, nganti
saiki ora ana tanduran sing bisa urip padahal ana ing sakubenge kono akeh suket
lan tanduran sing urip subur.
Ana
salore makam Nyai Ageng Ngerang uga ana papan sing dijenengi Muludan, tilas masjid paling tuwa ing
kutha Pati, saliyane kuwi uga ana padepokan sing di nggo nyebar agama Islam. Muludan kuwi ora pati amba. Saliyane
kuwi Nyai Ageng Ngerang uga duwe keramat;
1. Nyai
Ageng Ngerang isa teka ana ing makam nalika ana sing pengen Nyai Ageng Ngerang
teka kanthi cara diwacakke surat Al-Fatihah ping pira wae lan olah batin.
Nanging ora kabeh bisa nglakoni amarga sing bisa di temoni Nyai Ageng Ngerang
yakuwi wong sing oleh hadiah saka Rasulullah (wong sing duweni ati sing resik).
2. Nyai
Ageng Ngerang duwe “Jaran Sembrani” . Nalika Nyai Ageng Ngerang biyen dakwah, Nyai
Ageng Ngerang numpuk jaran iku mau. Lan nganti saiki penduduk Dusun Ngerang ora
ana sing oleh ngingu (angon) jaran amarga bisa dianggep ngluwihi jarane Nyai
Ageng Ngerang.
3. Nalika
ana acara Haul Nyai Ageng Ngerang, ana sing diarani kirab Luwur. Kirab Luwur
yaiku pucuke acara Haul Nyai Ageng Ngerang. Kain luwur/mori diarak mlaku awit
saka balai desa nganti tekan makam. Luwur sing anyar lan diarak kuwi mau dinggo
ganti luwur sing wis lawas. Kain luwur sing lawas di kethok-kethok dadi sapu
tangan, sabuk banjur dilelang ana ing jaba makam. Kain luwur iku mau dipercaya
akeh banget lan gedhe keampuhane.
4. Nyai
Ageng Ngerang duwe khadam arupa Lembu Peteng lan Macan. Nalika acara kirab
dilakokake, Lembu Peteng lan Macan kerep mara lan lewat ana ing ramene wong
sing lagi kirab. Lembu Peteng kuwi mau bareng-bareng wong akeh melu kirab
luwur, nanging orakabeh wong bisa ngerti laan weruh anane Lembu Peteng ing
tengah-tengahing warga. Mung wong khusus lan diwenehi keistimewaan saka Gusti
Allah SWT sing bisa ngerti lan weruh anane khadam sing arupa Lembu Peteng lan Macan kuwi mau.
5. Nyai
Ageng Ngerang pewaris Sendang Widodari
saka mbahe Dewi Nawang Wulan lan Ki Jaka Tarub. Uga oleh warisan Slandang Kemben kanggo golek, gawe lan
mbentuk lemah/bumi Ngerang. Miturut cerita, lemah/bumi Ngerang iku ora ana wong
sing kuat manggoni lan nganggo amarga cuba urip sing ditemoni lan ora bakal
ilang, kecuali wong Ngerang dewesing kuat manggoni lan manfaatke kanggo urip
lan kauripane manungsa.
6. Nyai
Ageng Ngerang duwe khadam rupa kewan bantheng. Nalika Nyai Ageng Ngerang garap
sawah, ana grumbulan bantheng ngamuk lan arep ngrusak tanduran nanging bantheng
kuwi mau bisa manut lan diwenehi ngombe saka esndang putih sing saiki ana ing
dusun Mbanger Mojomulyo Tambakromo Pati
Jawa Tengah. Sisih kidul makam Nyai Ageng Ngerang jurusan Dusun Slening ana
sawah sing dijenengi Sawah Betengan.
7. Angin
uga dadi tumpakane Nyai Ageng Ngerang. Nyai Ageng Ngerang bisa nyegah lan
ngundang angin. Nyai Ageng Ngerang uga duwe kentheng sing bisa nolak udan,
nalika wis rampung nyilih kentheng kuwi, mula kudu enggal cepet-cepet di
balikke.
8. Karak/sega
khusus sing wis didongake ana ing makam Nyai Ageng Ngerang. Sega karak iku
dipercaya lan diyakini berkah lan akeh manfaate. Bisa dadi obat, usaha,
ngilangke wereng lan liyane. Sing paling khusus yakuwi di nggo nolak angin.
Nalika angin banter karak mau diuncalke ana ngarep omah utawa duwur kentheng.
PENINGGALAN
MULUDAN
Muludan
yakuwi papan sederhana sing ora pati amba, biyen papan kanggo Pesantren lan
Masjid. Ing kono tau di bangun masjid lan Padepokan. Masjid mau dadi pusat
kegiatan keagamaan lan acara kegiatan sosial masyarakat. Muludan kuwi papan
sing kebak nilai sejarah, spiritual lan mistis. Uga ana nilai keajaiban lan
keramate.
PUNTHUK
Punthuk
yaiku papan sederhana sing lemahe ora amba kanggo semedi Nyai Ageng Ngerang,
sing duwe nilai mistis lan misterius. Papane ana ing tengah sawah. Punthuk kuwi
dadi panggonan sing istimewa kanggo Nyai Ageng Ngerang amarga papan kuwi di
nggo olah batin, pasa, tapa, tirakad lan munajat marang Gusti Allah SWT kanthi
bener-bener lan khusyuk.
WEDELAN
Wedelan
yaiku lemah sederhana sing digunakake kanggo usaha utawa mbatik lan mernani
kain jaman biyen. Usaha kuwi diarani medel.
Papane ora adoh saka makam Nyai Ageng Ngerang, yakuwi salore makam ana 20
meteran saka makam.
BUMI
SENTANA
Bumi
sentana yaiku papan sing pribadi kanggo perang para wong-wong keraton ing jaman
biyen. Ora ana ssing nyritakake bab bumi sentana maneh.
KENTHENG
LAN BATA
Kentheng
lan bata iki dipercaya bisa nolak udan kanggo kabeh sing nyilih kanggo
kaperluwan. Akeh wong sing duwe hajat kayata nikahan, khitan lan liya-liyane.
Akeh wong sing nyilih kentheng iku kanggo nulak udan. Menawa ana wong sing
nyilih kentheng mau, kudu cepet-cepet di balikke amarga watir yen sing nyilih
mau lali mbalike nganti ora gelem mbalikke. Mula ana alternatip loro sing
dilakoni yaiku kaping pisan disuwun langsung kaliyan Nyai Ageng Ngerang apa
sing nomer loro pengen di obrak-abrik omahe nganggo angine Nyai Ageng Ngerang.
Kentheng
lan bata jaman semana karo saiki beda banget. Ukurane p 20 cm lan l 30 cm lan
ing tengah-tengahe ana cap/stempel.
SENDHANG
PUTIH
Sendhang
putih iku cilik lan bentuke sederhana, nanging duweni sejarah lan keajaiban.
Miturut KH. Ridwan Aziz, sing ngurus ponpes Darul Muqoddas Banger, nalika
semana ana sakgrumbulane bantheng sing ngamuk lan ngrusak sawae warga. Bantheng
iku mau diwenehi ngombe saka Sendhang Putih mau banjur ora suwe bantheng mau
malih dadi manutan lan dadi pengikute Nyai Ageng Ngerang.
Anane
Sendhang Putih kuwi mau ing Mbanger Mojomulyo Kecamatan Tambakromo Kabupaten
Pati, di gunakake karo penduduk masyarakat kono lan didadekake papan wisata.
Ora mung kuwi, saliyane dadi papan spirtual uga diruwat kanthi cara mbangun lan
ngapiki sithik-sithik, sarta di rumat supaya dadi apik lan ana faedahe. Banyu
saka sendhang Putih ikumau ora tau asat, saengga masyarakat kono akeh sing
nggunakake banyu sendhang iku kanggo maneka warna hajat/pepinginan kayata obat,
usaha lan liya-liyane.
Para
sesepuh sing wis dadi Juru Kunci makam Nyai Ageng Ngerang;
1. Mbah
Sutosariman (Almarhum) tahun 1955-165
2. Mbah
Wiroji (Almarhum) 3 wulan
3. Mbah
Parto Radi (Almarhum) tahun 1966-1975
4. Mbah
Giman Astro (Almarhum) tahun 1975-2005
5. Mbah
Suparman TG tahun 2005-saiki.
Tidak ada komentar:
Posting Komentar